Oporrak amaitzear dira, eta aldi berean, ikasturte berria hastear da. Askok diote irailean hasten dela urte berria, eta, egia esan, badu bere logika, izan ere, oporretatik bueltatzen gara pilak kargatuta, ikasturte berriari tinko eusteko asmoz; iraila, badelako hasiera.
Hala, ikasturteari hasiera emateko, Dobera Euskara Elkartek irailerako programatu du aurtengo Hernaniko V. Liburu eta Disko Azoka!, Atsegindegin, irailaren 27rako, hain zuzen ere. Aurtengo edizioak 5 urte beteko ditu, eta Doberak azokari esker, euskarazko liburuak eta diskoak ezagutzeko eta zabaltzeko aukera eskaini nahi du, beste behin: «Euskal Herriko liburugintzaren eta musikagintzaren ekoizpena ezagutzera emanez, Euskal kultura sustatuz eta indartuz. Hori horrela, Hernaniko Liburu eta Disko Azokan euskarazko lanak soilik egoten ohi dira salgai».
Irailaren 27an, goizeko 11:00etan irekiko dituzte azokako ateak, eta eguerdiko 14:30etan itxiko dituzte, bazkaltzeko tarterako. Arratsaldean berriro irekiko dute azoka, 17:00etatik 19:30etara bitartean. Era berean, argitaratzaile eta ekoizleon lasaitasunerako, eguerdiko tartean Doberako kideak egongo dira postuak zaintzen.
Postuetan egongo direnentzako argibideak
Postuak jarriko dituztenek kontutan izan beharko dute, mahaiak prest egongo direla goizeko 09:30etarako, eta jarrian, bakoitzak bere postua montatu beharko duela. Muntaketari dagokionez, Doberak ondorengo argibideak elkarbanatu ditu: «Postuen muntaiarako (eta jasotzeko) autoak posturaino gerturatu ahal izango dira. Pilaketak saihestu eta antolaketa hobeagorako, postu bakoitzeko auto bat sartu ahal izango da plazan eta deskargatu bezain pronto autoa plazatik atera beharko du. Postuak 10:30etarako prest egon beharko dute».
Doberak adierazi du argitaletxe, ekoizle edota argitaratzaile bakoitzak «gehienez bi mahai» jarri ahal izango dituela. Apaingarriei dagokienez, «bakoitzak bere modura atondu daitezke, betiere erabiltzen den hizkuntza euskara delarik, noski». Horrez gain, Doberak dio kontutan hartu behar dela paretarik izango: «horrenbestez, bakoitzaren identifikagailua ere norberak ekarri beharko du. Postuak, mantela duten mahaiak izango dira, 2,10 x 0,80 metrotakoak». Postuen kokapena zozketa bidez egingo du Doberak.
Postua jartzea doakoa dela azpimarratu du Doberak, eta bestalde, azokara bertaratzerik ez dutenentzat irtenbidea jarri du Hernaniko Euskara Elkarteak: «Azokan parte hartzeko aukera izango dute; produktuak ekarrita eta postua Doberako kideek osatuta. Horrela eginez gero, salmenten %50 ordaindu beharko zaio elkarteari».
«Azoka indartzen» ari dela azpimarratu du Doberak: «Iaz, Liburu Azoka izatetik, Liburu eta Disko Azoka izatera pasa ginen, diskoei ere bere tartea eskainiz. Eta urtetik urtera, jartzen diren postuak ere gora doaz!».
Hernaniko V. Liburu eta Disko Azokan postua jarri nahi duenak, beraz, bete eskaera irailaren 6a baino lehen, ondorengo estekan sartuta: https://docs.google.com/forms/d/e/1FAIpQLSfU8yVmmEkx1xRIhXSMOEvaR1gG2NT6pTHrGD5ivPcnnsO_w/viewform.