100 urte bete dituzten hernaniarren zerrendara batu zen beste bizilagun bat, asteazkenean: urtebetetze borobila izan zen Antonio Tapia Txapartegirena.
1925eko uztailaren 16an jaio zen Asteasun, eta Anoetan eta Donostiako Loiola auzoan egin du bere bizitzaren zatirik haundiena. Duela bost urte etorri zen Hernanira bizitzera, Oskar semearen eta Argiñe Zubiri errainaren etxera. Igeltseroa lanbidez, bertsozale eta baratze-zaintzaile porrokatua izan da Tapia.
100garren urtebetetzean, ondoan izan zituen etxekoak, Asteasuko Inaxio anaia, eta Anoetako Xantine jatetxeko lagunak. Hernaniko Udalaren bisita ere jaso zuen etxean, Ainara Atorrasagasti zinegotziaren eskutik. Lore-sorta jaso zuen opari.