Sei orduko festa izango da gaur arratsalde eta gauean, Ave Maria parkean. Musika elektronikoarekin emango diote hasiera Udaparkean programari, eta DantzPoint proiektuko disko-jartzaileek jarriko dute erritmoa, arratsaldeko 18:00etan hasi eta 00:00etara arte.
Musika elektronikoa eta garaikidea du ardatz Dantz kolektiboak, eta 9 urte daramazki ekimen eta proiektu ezberdinak sortzen. Horietako bat da DantzPoint, mota guztietako festak girotu dituena. Hernanin, Tom Karobi, Santech eta Bitter Ana izango dira disko-jartzaileak.
13 jarduera eta emanaldi, uztailaren 24tik 26ra
Gaur hasiko da Udaparkean programa, baina datorren astean izango ditu egun potenteenak: 13 jarduera eta emanaldi prestatu dituzte, uztailaren 24tik 26ra.
Ostegunean yoga saioa izango da goizean, eta haur jolasak, Mireia Miracle konpainiaren antzerki-clown ikuskizuna eta Kresalaren dantza emanaldia arratsaldetik aurrera. Ostiralerako, berriz, jarduera ugari antolatu dituzte: yoga, jolasak, 'Desprovisto' zirku ikuskizuna, Sol Band taldearen kontzertua... Eta larunbatean, bukatzeko, beste lau zita izango dira. Arratsaldean, emanaldi bana eskainiko dute Potx eta Lotx pailazoek eta Kamikaz antzerki kolektiboak, eta hartubolean aritzeko aukera ere izango da. Gauean, berriz, Olaia Intziarteren kontzertua izango da Ave Marian.