Kinka larrian geratu dira Barrenetxea IV eta Ezkurra II

Ez da nahi bezain ondo hasi uda sasoia Endika Barrenetxea hernaniarrarentzat. Josetxo Ezkurrarekin batera, larunbatean jokatu zuen Jai Alai Summer Season txapelketako bigarren partidua, eta porrota jaso zuten berriro: 8-15 eta 14-15, Aldaberen eta Juanenearen kontra.

Gauzak horrela, kinka larri­an geratu dira. Garaipena lortu beharko dute ligaxkako hirugarren partiduan, eta horrela ere zail izango dute finalerako txartela eskuratzea. Aldabe-Juanenea eta Azpiroz-Ansa II bikoteak launa punturekin daude, partidu bakarra jokatuta.

Hain juxtu, larunbatean bertan lortu zuten garaipena Azpirozek eta Ansak, Se­gurolaren eta Larrañagaren kon­tra (15-11 eta 15-9). Ezohiko postuetan aritu arren (Azpiroz aurrelari eta Ansa atzelari), bikain moldatu ziren biak estreinakoan.

Udari ondo ekin dioten erremontistak goizuetarrak dira. Oriamendi txapelketan, garaipenarekin ekin diote biek ala biek: Aritz Zubirik ostegunean irabazi bazuen Ugaitz Susperregirekin batera, larunbatean Oier Apezetxeak lortu zuen garaipena, Urtzi Gurrutxaga lagun, Jabaleraren eta Eskuderoren kontra (14-15, 15-11 eta 8-3). Sailkapeneko buru dira bi goizuetarrak, hiruna punturekin; baina haien kasuan, txapelketak luze joko du oraindik, irailera bitarte.