Gaur jokatuko dituzte Gipuzkoako Bost t'erdiko Txapelketaren finalak, eta Hernanin izango dira, zozketak hala erabakita: arratsaldeko 16:00etan hasiko da jaialdia, kiroldegiko frontoian.
Gainera, bailarako bi palista izango dira protagonista nagusiak. Izan ere, elkarren kontra jokatuko dute Enara Macicior ereñotzuarrak eta Amaia Irazustabarrena hernaniarrak, nagusien lehenengo mailako finalean. Txapelketa borobila osatu dute biek, jokatutako partidu guztiak irabazita.
Jaialdiko azkeneko partidua izango da haiena, eta aurretik jokatuko dira beste hirurak. Aurrena, Intxurreko Luluaga eta Behar Zanako Irazusta ariko dira, jubenilen bigarren mailako finalean. Ondoren, Behar Zanako Aldabe eta Lasa ariko dira aurrez aurre, jubenilen lehenengo mailakoan. Eta segidan, Beotibar taldeko Balerdik eta Aranburuk jokatuko dute elkarren kontra, nagusien bigarren mailakoan.
Maciciorrek eta Irazustabarrenak emango diote bukaera puntako jaialdiari.