Giro ederra eta irudi are politagoak utzi zituen atzoko egunak. Euskal Herriko ehunka dantzari bildu ziren Hernanin, aurtengo Dantza Asteko edizioari amaiera emateko. Goizean auzoz auzo dantzan ibili ziren talde ezberdinak, eta eguerdiko 13:30ak aldera elkartu ziren guztiak, Gudarien Plazan. Bertan osatu zuten ekitaldi nagusia.
Urtero lez, dantza talde bakoitzaren berezitasunak ikusteko tartea izan zen, jantziak, dantzak eta erritmoak. Guztira Euskal Herri osoko 17 dantza talde inguruk hartu zuten parte, baita musika talde ezberdinek, Hernaniko bertsolariek eta irrintzilariek.
Eguraldiak lagunduta, laino beltzak azkar uxatu ziren eta plazara sartu orduko eguzkiak bete-betean jotzen zuen. Giro paregabea aprobetxatuz, batek baina gehiagok eman zuen publikotik atera eta plazara dantzara salto egiteko pausua. Guztien artean, amaiera borobila eman zioten aste berezi honi. Baina ez zen festa plazan amaitu, ondoren, elkarrekin joan ziren bazkaltzera, eta erromeriarekin itxi zuten eguna.
