Indartsu bueltatuko da Kulturarteko Plaza Feminista, Aste Santuko etenalditik. Izan ere, hiru hitzaldi eskainiko dituzte bertan, gaur eta bihar.
Saio informatibo eta praktikoak izango dira aurreneko biak, Amher elkarteak antolatuta. Gaurkoan, Espainiako nazionalitatea lortzeko prozesua izango dute hizpide Kulturarteko Plaza Feministan, arratsaldeko 17:00etan hasita. Bihar, berriz, Espainiatik kanpo egindako ikasketak homologatzeari buruz ariko dira, goizeko 11:30etan hasita: 'Zertarako, nola eta zergatik homologatu nire ikasketak?'.
Emakume ijitoei buruzko hitzaldia, Palmira Dualek
Bihar bertan, beste hitzaldi bat ere izango da arratsaldean, 'Arrazakeria eta kulturartekotasuna: gogoeta partekatuak' zikloaren barruan. Emakume ijitoak eta giza eskubideak izango ditu hizpide Palmira Dual Jimenezek, Kera elkarte feministako koordinatzaileak. 18:30etan hasiko da saioa, KPFn.