Bertso sorta umoretsuak, kritikoak, oldarkorrak, teknikoak, profesionalak... Denetarik sartzen da zirku haundi bateko karpan, eta hori agerian geratu zen Bota Bertsoa lehiaketaren 11. edizioko sari banaketa ekitaldian.
'Hau bai zirkua!' gaiari erantzun diote aurten sagardotegietako bertsolariek, eta 150 bertsopaper jaso dituzte Dobera Euskara Elkarteko kideek.
Atzoko ekitaldian irabazle ugari elkartu zituen Doberak Biteriko atarian. 23 sagardotegik parte hartu dute aurtengo edizioan, eta horien sagardo kaxak, otorduak eta produktuak izan ziren sarietako batzuk. Horiez gain, Haatik dantza konpainiaren OTS ikuskizunerako gonbidapenak ere irabazi zituen garaileren batek.
Bertso sarituez gain, libreko bertso saio txiki bat ere izan zen atzokoan. Andoni Rekondo hernaniarra eta Libe Goenaga arduratu ziren ekitaldiaren errepasoa egiteaz.
MOROSOEN SARIA
EGILEA: AITOR EIZAGIRRE
Doinua: Gizona da zoroa
Hau bai dala zirkua
ta txuleta duna
Errima label eta
sagardo leuna
Pailazo, akrobata
hori da jarduna
Eskapista daukagu
pagatu bertzuna
ENTXUFATUEN SARIA
EGILEA: TXIRULAKAÑAK
Doinua: Maritxu nora zoaz
Itxas Burun gaude ta
ezin da kantatu
Gure artean gaude
lehoi, tigre, katu
Animalin zirkoa
da Hernaniratu
Gure herria ondo
zaindu ta tratatu
KALIGRAFIAREN SARIA
EGILEA: ANDREA GALEANO
Doinua: Adixkidia Andoaindikan
Zenbat hilabete egon garen
sagardo on bat edateko
Pailazokeri giro honetan
sagardo hau dastatzeko
Malabaristak zein trapezistak
denak ditugu gustuko
Hurrengo urtean hala ere
hemen egongo gara berriro!
AGRESIBITATE SARIA
EGILEA: AMAIA ETXEBERRI
Doinua: Behin batean Loiolan III
Sagardotegira iritsi
ta hoi da zirkoa
Irrintzie entzun beharrez
buia da ohikoa
Ez ote det edan ba
sagardo nahikoa
Akatzekotan nao ni
jertse horikoa
LIGOTEO SARIA
EGILEA: IBAI RODRIGUEZ
Doinua: Gizona da zoroa
Zaila degu gaurkuan
guk jartzea gaia
Baina sagardoari
hartuaz usaia
Eskertzeko heldu da
oraintxe garaia
Eskerrik asko bihotzez
benetan Zelaia