Martxoa emankorra suertatu zaio Iñigo Legorbururi. Izan ere, guztira lau sari pilatu baititu Itsasu, Idiazabal eta Bermeo herrietan, bertan antolatu dituzten lehiaketetan. Bertsopaperen Itsasuko eta Idiazabalgo lehiaketen kasuan, berriro ere irabaztea lortu du.
Martxoaren 9an, Bermeoko Erroxape emakumeen elkarteak antolatua, bi urtean behin antolatzen duen narrazio laburren lehiaketako epaia emaneta bertan hirugarren saria jaso zuen Bihotzetik bihotzera ipuinarekin.
Pasa den ostiralean eman zituzten aditzera II. Florentino Goiburu bertsopaper lehiaketako irabazleen izenak eta bertan, sari bikoitzarekin bueltatu da Legorburu etxera lehenengo eta bigarren sariak lortuta. Lehenengo saria Bizitzaren golak sortarekin lortu du. Bigarren saria, berriz, Epaile(r)tzak lanarekin lortu zuen.
Amaitzeko, Lapurdiko Itsasuko bertso bazkarian eman zituzten jakitera III. Aitor Sarasua bertsopaper lehiaketako irabazleen izenak eta nagusietan, berriro ere Legorburu gailendu da Amaia Agirreren aurretik. Ume, gazte eta helduen sorta guztiak batuta, 75 lan aurkeztu dira orotara. Legorbururen Jaiotze basatia lana izan da irabazlea.