Hernaniko Udalaren parke publikoa osatzen duten etxebizitza eta zuzkidura-bizitokien eskatzaile izan nahi dutenentzako itxaron-zerrendak irekiko ditu udalak. Gaurtik maiatzaren 5a arte izango da eskaerak egiteko aukera. Itxaron-zerrenden helburua udalaren jabetzako etxebizitzen parke publikoan hutsuneak daudenean, horiek alokairuan betetzea izango da. Gaur egun, 36 etxebizitza kudeatzen ditu Udalak.
Bi itxaron zerrenda osatuko dira: batetik, etxebizitza-eskatzaileena eta bestetik, zuzkidura-bizitokiena. Helburua, bizikidetza unitateen beharretara hoberen egokitzen den baliabidea esleitzea izango da.
Alokairu publikoko etxebizitzen eskatzaileak
Alokairu publikoko etxebizitza-eskatzaileen kasuan, hiru talde osatuko dira, bizikidetza-unitateen arabera: gehienez 2 kidekoak; 3 edo 4 kidekoak eta bost kidekoak. Horrez gain, EAEn etxebizitza babestuaren arloan indarrean dagoen araudiak zehaztutako baldintzak ere bete beharko dira. Diru-sarrerei dagokionez, esaterako, 9.000 eta 45.022,57 euro arteko irabaziak dituzten bizikidetza-unitateek izango dute eskaera egiteko aukera (2023ko diru-sarrerak).
Itxaron-zerrenda osatzeko baremazioan kontuan hartuko dira egoera ekonomikoa, egoera sozio-laborala, Etxebiden antzinatasuna, herriko errotzea eta egoera bereziak. Horiek guztiek zehaztuko dute itxaron-zerrendako hurrenkera.
Alokairu publikoko udal etxebizitzak gehienez 8 urterako esleitzen dira.
Zuzkidura-bizitokiak, 35 urtez azpiko gazteentzat
Zuzkidura-bizitokiak, aldiz, gazteei zuzenduko zaizkie (35 urtez beherako herritarrak). Bizitokiaren azalera eta ezaugarrien arabera, lau talde osatuko dira: mugikortasun urri iraunkorra duen 35 urtez azpiko kide bat gutxienez baduten bizikidetza-unitateak; gehienez 35 urtez azpiko bi kidek osatutako bizikidetza-unitateak; hiru edo lau kidez osatutakoak eta, bost kidez osatutakoak.
Itxaron-zerrenda osatzeko, bizikidetza unitatearen diru-sarrerak eta ondasun higiezinen balioa hartuko da kontuan. EAEn etxebizitza babestuaren eta zuzkidura-bizitokien arloan indarrean dagoen araudiak zehaztutako baldintzak ere bete beharko dira. Diru-sarrerei dagokionez, 3.000 eta 45.022,57 euro arteko irabaziak dituzten bizikidetza-unitateek izango dute eskaera egiteko aukera (2023ko diru-sarrerak).
Udalaren zuzkidura-bizitokiak gehienez ere bost urterako esleitzen dira.
Eskaerak telematikoki edo aurrez aurre aurkezteko aukera
Itxaron-zerrendek bi urteko iraupena izango dute eta uneoro www.hernani.eus-en egongo dira ikusgai.
Etxebizitza zein zuzkidura-bizitokien itxaron-zerrendan izena emateko eskaerak www.hernani.eus-en telematikoki edo Herritarren Harrera Zerbitzuan (HHZ) aurkeztu daitezke. Horretarako, eskaera-orriak behar bezala bete beharko dira. Hauek ere www.hernani.eus-eko Iragarki Taulan eta HHZn egongo dira eskuragai. Talde bakoitzak eskabide orri berezitua dauka, beraz, interesatuei erne ibiltzeko eskatzen zaie.