Emozio beteko finalarekin amaitu zen larunbatean Berria Txapelketa. Goikoetxea V eta Goikoetxea VI izan ziren garaileak, momentu erabakigarrietan gehiago asmatuta.
Bi setak irabazita jantzi zuten txapela Goikoetxeatarrek, baina Gurrutxagak eta Eskuderok lan haundia eman zieten partiduan zehar. Lehenengo seta 15-12 amaitu zen, eta bigarrena 15-10. Set bakoitzeko azken tantoetan Goikoetxea V nabarmendu zen, partiduko erremontari onena.
Finalaren amaieran pozarren agertu ziren Joseba eta Ander Goikoetxea: «Behetik gora egin dugu txapelketan zehar, baita gaur ere. Hortzak estutu ditugu eta gugan sinesteak eraman gaitu txapela lortzera».
Urriza eta Barrenetxea nagusi, hirukoaren aurka
Arratsaldea borobiltzeko, 2vs3 formatuko partidua jokatu zuten galarretan. Urrizak eta Barrenetxeak nagusitasunez irabazi zuten Aldabek, Segurolak eta Azpirozek osatutako taldearen aurka. Barrenetxeak sekulako partidua jokatu zuen, peloteoan eta sakean asko asmatuta. Hirukoteari, aldiz, kosta egin zitzaion formatura egokitzea, eta ez ziren eroso ibili kantxan.