Lan saio polita izan zen igandekoa, Hernaniko Maialen traineruarentzat. Pasaiako test estropadan hartu zuen parte, traineru indartsuenekin batera. Izan ere, bertan aritu ziren Euskotren Ligako zortzi traineruak, eta ETE Ligako lau. Azkeneko postuan bukatu zuten hernaniarrek, baina ez zituzten urrutiegi izan ETE Ligako bi lehiakide, Kaiku eta Zarautz. Tolosaldea nagusitu zen, 11:04ko denborarekin
12:10 denboran osatu zuen estropada Maialenek, eta zortzi segundu aurretik izan zuen Zarautz. Kaikuk, berriz, 24 segundu gutxiago behar izan zituen. Kontuan hartu behar da, iazko ETE Ligan hirugarren eta laugarren izan zirela Zarautz eta Kaiku, eta zortzigarren sailkatu zela Hernani. Bere kontrario zuzenek ez zuten parte hartu Pasaiako estropadan.
Neska promesen batela hirugarren, Zumaian
Larunbatean, bestalde, Gipuzkoako Batel Ligaren azkenaurreko jardunaldia jokatu zen Zumaian, eta Hernaniko hiru batelek hartu zuten parte. Neska promesetan, hirugarren sailkatu zen Hernaniren A taldea, 7:34 denborarekin, Tolosaldearen (7:25) eta San Juanen (7:30) atzetik. Hori horrela, sailkapena ia erabakita geratu da: Tolosaldea liderrak (187 puntu) abantaila haundia dauka Hernanirekin (178) eta Zumaiarekin (170). Hernaniko B taldea bederatzigarren izan zen Zumaian (8:06).
Neska jubeniletan, berriz, laugarren sailkatu zen Hernani, 9:10 denborarekin. Aurretik izan zituen Hibaika (8:55), San Juan (9:01) eta Zarautz (9:03). Sailkapen nagusian ere, laugarren postuan bukatuko dute hernaniarrek, azkeneko jardunaldian ezustekorik ez bada. 75 puntu dauzka Hernanik, eta aurretik daude Hibaika (90), Tolosaldea (85) eta San Juan (80). Atzetik, urruti dago Zarautz (62).