Motibatuta eta garaipena lortzeko gogoz iritsi ziren Hernaniko jokalariak Gernikara, baina ezin izan zuten garaipenarekin bueltatu. Partidu gogorra izatea zen taldearen aurreikuspena, eta lehenengo jokaldietan Hernani ondo aritu zen arren, bizkaitarrak nagusi izan ziren ondorengo minutuetan. Denbora aurrera joan ahala zuloa zabaldu zuten markagailuan, eta azkenean 49-15 izan zen emaitza.
Susto txiki bat behintzat ematea lortu zuen Hernanik. Partidua ondo baino hobeto hasi zuten trikoloreek, eta 9. minutuan entsaioa egin zuen Jon Ander Zapiain kapitainak. 20. minutura arte ondo eutsi zion Hernanik Gernanikaren erasoari, baina hortik aurrera nagusitasunez aritu zen etxeko taldea. Emaitza zertxobait hobetzeko Anartz Elosegik egin zuen Hernaniren bigarren eta azken entsaioa, 78. minutuan.
Emaitza honekin, sailkapeneko bosgarren postuan dago Hernani, bi garaipen eta bi porrot jasota. Taldearen helburua lehenengo lauen artean amaitzea da, igoera faseko play offak jokatu ahal izateko, eta oraindik eskura du hori lortzea.
Sailkapeneko goialdean mantentzeko, ordea, ezinbestekoa da etxeko partiduetan emaitza onak lortzea. Igande honetan Cisnerosen aurka arituko dira Landaren; 13:00etan hasiko da partidua, eta zaleen babesa izugarri estimatuko dute jokalariek.
Aurkari gogorrak Sevillan
18 urtez azpiko taldeak Sevillan jokatu zituen Espainiako Txapelketako partiduak. Esperientzia ederra izan da herriko gazteentzat, baina aurkari gogorrekin egin dute topo bertan. Lehenengo partiduan 24-3 galdu zuen Hernanik Alcobendasen aurka, eta bigarrenean 29-3 Ciencias taldearen kontra.
Bi partiduak galduta, aurrera egiteko aukerarik gabe geratu ziren hernaniarrak. Hala ere, klubetik denboraldiaren balorazio oso positiboa egin dute, 18 urtez azpiko taldeak lehenengo postuan amaitu baitu Euskal Liga.