Hernani Errotzenek, hiru hitzaldi udaberrian

Kronika - Erredakzioa 2025ko api. 1a, 00:00

Gaur zortzi, apirilaren 10ean eta maitzaren 8an eskainiko dituzte Biteri kultur etxean.

 

Hernani Errotzen elkarteak hiru hitzaldi antolatu ditu udaberrian. 2025eko ekitaldien programari hiru hitzaldi interesgarriekin emango diete hasiera. Herri oroimena eta euskal kulturan garrantzia duten pertsonen ekarpenak jorratuko dira. 

Lehenengo hitzaldia, gaur zortzi, asteartean izango da 19:00etan, Biteri kultur etxean. Argitu, ez suntsitu elkarteko Josetxo Mendiak eskainiko du eta bertan, Iruña-Veleiako gaia jorratuko da Iruña-Veleia aztarnategi eta auzi baten historia izenburupean. Iruña-Veleiako aztarnategian topatutako grafitoez eta eskabadora erabiliz egiten ari diren suntsiketaz izango da hitzaldia.

Bigarren hitzaldia, apirilaren  10ean izango da XI-XII. mendeak. Testuinguru soziopolitikoa izenburupean. 19:00etan hasiko da Biterin eta Aranzadi Zientzia Elkarteko Josu Narbartek eskainiko du. Gipuzkoak garaiko lurralde egituran zuen tokia aztertuko dute; Iruñeko erresuman eta elizbarrutian, hain zuzen ere. Segidan, orduko gizartea nola antolatuta zegoen aztertuko dute.

 

Maiatzaren 8ko hitzaldiak itxiko du udaberriko programa

Hirugarren hitzaldia, maiatzaren 8an, izango da Ezkutatu diguten historia izenburupean. 19:00etan hasiko da Biterin eta Idoia Arrieta historiako irakasleak eta doktoreak eskainiko du. XII. mendean Gipuzkoa lur eremu zehaztugabea zen, ez zen barruti politiko-administratiboa oraindik, batzuk hala azaldu nahi badute ere. Orduko Ipuskua eta Hernani-Donostia Nafarroako erresuma ziren, bai; batzuek hori ezkutatu nahian badabiltza ere. Hortaz, 1200. urtean, geroago probintzia izango zen Gipuzkoak ez zuen lurralde batasunik.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!