Manuel Reboredo eskulturgileak Munstro bat ni ikustera etorri da erakusketa jarriko du gaur Biteriko gelan eta apirilaren 28ra arte egongo dira ikusgai bere lanak. Oiartzunen bizi den artistak 50 lan inguru jarriko ditu. «Material eta tamaina ezberdinetan. Batzuk orain dela hamar urteko lanak dira eta beste batzuk berriagoak, azken bi urtekoak». Egurra, tinta, resina, hormigoia, letoia, larrua, zeramika, kobrea, harria eta batez ere burdina landu ditu Errenterian, Pasaian eta Oiartzunen bizi izan den irakasleak.
Reboredo irakaslea da mekanika diseinuan eta eraikuntzan. «Lagunekin eta ikasleekin hasi nintzen eskulturgile bezala prestatzen eta ideia onak atera ziren. Eskultura bat egin nuen ideietako batekin». Reboredo ez da osasun aldetik momentu onenak bizitzen ari eta hortik dator erakusketaren izena. «Minbizia daukat eta gaixotasuna da munstro hori. 2023an egin nuen lanetako bati ere ematen dio izena eta hortik dator erakusketarena ere. Bertan egongo da ikusgai».
Eskulturak beti beretzat egin dituen arren, oraingoan jendearen aurrean erakustera ausartu da. «Nire etxea eskulturaz beteta dago. Etxebe eta beste lagun batzuk animatu zidaten horrenbeste eskultura izanda, erakusketa antolatzera. 200 lan baditut etxean eta hortik sortu zen erakusketa egiteko ideia».
Beraz, Biteriko bere lehenengo erakusketa izango da. «Taberna batean egon ziren eskultura batzuk, baina gutxi ziren. Hori eta gero, lagunek esan zidaten erakusketa haundiagoa antolatzeko eta ideia ona iruditu zitzaidan ikusita nire osasuna ez zela onena. Animoz ez nengoen unerik onenean, orain hobeto nago, eta erakusketa egitea ongi etorriko zitzaidala pentsatu nuen. Lagunak izan dira antolakuntzaren arduradunak, dena egin dutenak. Ni gauza gutxi egiteko gai naiz une honetan».
Hori bai erakusketan erakusgai izango diren lanak Reboredo berak aukeratu ditu. «Lagunek eta familiako kideek etxean dituzten nik egindako lan batzuk ere elkartu ditugu eta 50 eskultura horien parte izango dira. Interesgarriak dira».
Biterin ikusiko diren lanek «hiru-lau etapa azaltzen dituzte»
Material eta tamaina ezberdinak izan arren eskulturek hiru-lau etapa azaltzen dituzte. «Pasaiako Udalak urtero 12 zentimetro erakusketa antolatzen du. Artisten lanek ezin dute hamabi bider hamabi zentimero baino tamaina haundiagoko lanik aurkeztu. Gehienez bakoitzaren bi lan izaten dira erakusgai eta nik bertarako egin nituen lehendabiziko eskulturak. Burdinezkoak ziren».
Tamaina txikikoak izanik, harria lantzen hasi zen ondoren Reboredo, eskultura haundiagoak egiteko. «Harriarekin beste eskultura batzuk egin nituen. Ibaietako eta erreketako harriak burdinarekin uztartzen nituen. Oporretara eta bidaietara joaten nintzenean leku bakoitzetik (Baionatik edo Portugaletik esaterako) harriak hartu eta lantzeko etxera eramaten nituen. Gustuko nituen harriak noski. Horrekin egin nituen beste etapa bateko eskulturak».
Trenbideetako egurrezko bigak zeuzkan Reboredok etxean eta hurrengo etapan material horrekin hasi zen lanean. «Etapa horretan beste egurrezko hamabi eskultura egin nituen». Azken boladan, azken etapan, «berriz ere burdinera itzuli naiz».
Gaur arratsaldean aurkezpen ekitaldia izango da
Eskulturen artean ikusi daitezke besteak beste: Chillidari omenaldia, Koroa, Ama Birjina, Anima, Big Bang, Besarkada, Dantzariak, Donibane, Eliza, Errekako Egurra, Eskua, Harria, Herriko Plaza, Herriko Ermita, Ilargia Hirian, Izarrak Zeruan, Kubo, Laiak, Lauburu, Loreak, Tristura, Proiekzioak, Totem, Txoria, Usoa Pakearen bila, Zauria... Lan gehienak 2016 urtetik 2023 urte artekoak dira. Ez dira tamaina haundikoak eta hilabete osoan zehar ikusteko aukera izango da.
Manuel Reboredok nahiko luke erakusketan egunero bertan egon, baina bere osasunaren menpe dagoenez ez daki noiz izango den bertan. «Inaugurazioa gaur izango da eta egon nahiko nuke. Lagunak bertan egongo dira».
Aurkezpen ekitaldia egingo da gaur arratsaldean eta bertaratzen denak aukera izango du otordutxo txiki bat jateko. «Jatekoa izango da, pastaren batzuk ez dira faltako». Eskulturak goizez eta arratsaldez ikusi ahal izango dira Biteri irekita dagoen orduetan.