Extremadurako Jardunaldiek 31. edizioa beteko dute larunbatean

Kronika - Erredakzioa 2025ko api. 1a, 00:00

Extremadurako jardunaldia Atsegindegiko plazan izaten da.

Extremadurako produktuen erakusketa 10:00etan hasiko da eta eguerdian abesbatza eta dantza taldearen ekitaldia izango da.

 

Extremadurako jardunaldiak hilabete aurreratu dira aurtengoan eta datorren larunbatean ospatuko dute 2025ekoa. Aurten, 31. urteurrena izango da eta Extremadurako kultura he­rrian zabaltzeko aukera paregabea eskainiko du. 

Hain justu, larunbatean, apirilaren 5ean ospatuko dute jardunaldia Atsegindegiko estalpean. Donostiako Centro Cultural Ex­­tremeñok antolatzen du eta laguntzaileak dira Extremadurako Junta, Badajozeko Diputazioa eta Hernaniko Udala.

Larunbatean, Extremadurako za­pore eta usainak iritsiko zaizkie hernaniarrei. 10:00­etan hasita Atsegindegin, Extrema­du­rako jaki gastronomikoen fes­ta egon­go da; probatu, dastatu eta erosteko aukerarekin.

Postuak jarriko dituzte, ber­tako gastronomiarekin eta informazio turistikoarekin. Pintxoak eta ardoa ere izango dira aukeran. Goiz osoan egongo dira bertan, eta ondo girotuta, gainera. Musikak ez du etenik izango, Extrema­du­rako jotekin eta kantu tipikoekin, eta dantza ere ez da faltako.

Gainera, 13:00etan, ohiturari jarraituz Virgen de Guadalupe taldeko koru eta dantzariek emanaldia eskainiko dute Atsegindegin bertan Extremadurako jantzi tradizionalekin.

 

Estatuko komunitate haundiena Hernanin

Bertakoen aldetik laguntza eta babes haundia izan dute betidanik. Ikusmina pizten dute Extremadurako Jardunaldiek, eta oso egun polita da. 

Hernanira, Torreorgaz herritik etorri ziren gehienak, Orbegozon lan egitera, eta ez ziren gutxi: Extremaduratik etorritakoak dira bigarren komunitate haundiena Hernanin, Nafarroatik etorritakoen atzetik.

Donostiako Centro Cultural Extremeñoko kideen esanetan. «Bertako batzuk harrituta geratzen dira gure folklorearekin. Esan izan didate: 'ez dauka zerikusirik Andaluzioakoarekin'. Noski ezetz, gure folklore propioa eta berezia daukagu».

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!