«Euskara euskaldunon hitzezko lengoaia den moduan, euskal dantza euskaldunon gorputz-hizkuntza dela aldarrikatuko dugu»

Kronika - Erredakzioa 2025ko mar. 31a, 00:00

Hernaniko haurren aurreskua, 1928. Argazkia: Hernaniko Udal Artxiboa.

Aratz Ikastolako Euskera Batzordearen eskutik, Oier araolazak hitzaldia emango du asteazkenean, apirilak 2, Biterin. Bertan, besteak beste, euskal dantzak euskaldunei, zer eskaintzen dien aztertuko du.

 

Ez da lehen aldia Oier Araolaza Aratz Ikastolara gerturatzen dena, izan ere, behin baina gehiagotan jaso du gonbidapena euskal kulturarekin harreman zuzena duten gaiei buruz hitz egiteko. Aratz Ikastolako Euskera Batzordearen eskutik etorri da proposamena, eta euskal kulturaren inguruko hitzaldia antolatu dute etzirako. Horretarako, beste behin, Arolaza gonbidatu dute. Hitzaldi formatuari eutsiko diote, eta hitzordua asteazkenean izango da, arratsaldeko 18:00etan, Hernaniko Biteri Kultur Etxean.

Dantzan elkarteko kidea da Araolaza, eta zehazki, dantza «euskaldunon gorputz hizkuntza» dela aldarrikatzen du, besteak beste. Araolaza dantzaria da, Eibarko Kezka eta Donostiako Argia dantzari taldeetan aritzen da gaur egun, eta Dantzan elkartearen zuzendaria ere bada. Ikasketa zerrenda luzea du: Gizarte Komunikazioan doktorea, Antropologia eta Informazio Zientziak gradu-ikasketak egin ditu, Musikologian ikasketa aurreratuak eta Artearen eta Musikaren Historian ikertzaile nahikotasuna eskuratu du. Euskal dantzaren historia ikertu du, eta hainbat artikulu eta lan ere argitaratu ditu dantzaren inguruan.

 

Euskal dantzak, zertarako?

Dantzan elkarteak saio hauetan, «euskara euskaldunon hitzezko lengoaia den moduan, euskal dantza euskaldunon gorputz- hizkuntza» dela aldarrikatzen du. «Dantzak, gizakioi, oro har, eta euskal dantzak euskaldunoi, zehazki, zer eskaintzen digun aztertuko dugu». Dantza historian zehar euskaldunon identitatearekin lotuta ageri bazaigu ere, identitateaz gainera, dantzaren bidez «herria batzen eta komunitatea egituratzen laguntzen duten erritualak eta sinboloak gorpuztu» daitezkeela azaltzen dute elkarteko kideek.

 

Dantzan: euskal dantzaren dibulgaziorako tresna

Dantzan elkartea euskal dantzaren sustapenean eta dibulgazioan lanean aritzen den elkartea da. Euskal dantzazaleek sortu zuten 2001. urtean eta bereziki, euskal dantzaren dokumentazioan, ikerketan, sustapenean eta komunikazioan aritzen dira lanean.Bai dantzan.eus atariaren bidez, bai aurrez aurreko saioen bidez ere.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!