Hernaniko Udalak haziera eskolak jarriko ditu martxan datozen hilabeteetan. Guraso talde baten proposamenetik abiarazi zen «haziera osasungarrian bidelagun» izateko saio hauek, eta guztira doako hiru saiok osatuko dute eskola: tailer bat eta hitzaldi bana.
0 eta 6 urte arteko haurrak dituzten gurasoei zuzendutako saioak izango dira, eta landutako gaiak, guraso taldearen eta Udalaren artean adostutakoak izango dira.
Saioak apirilaren 9an, 29an eta maiatzaren 7an izango dira, hirurak doan. Hala ere, Udalak aurreratu du derrigorrezkoa izango dela izena ematea.
Emozioen kudeaketa, garapen psiko-afektibo-sexuala eta psikomotrizitatea hizpide, hiru saiotan
Lehenengo saioa Amaia Vazquez Eguzkitza psikologo klinikoak eskainiko du, eta haurren garapen psiko-afektibo-sexuala eta soziala izango du hizpide. Udaletxeko areto nagusian izango da, apirilaren 9an arratsaldeko 17:30etatik 19:00etara. Euskeraz izango da saioa, aldibereko itzulpenarekin espainierara, eta gurasoen galderak erantzuteko tartea izango da.
Tailerra Maddi Soroa Hernandez psikomotrizitatean espezialistak emango du, eta kontzeptu teorikoen bidez, psikomotrizitatea zer den eta zertarako den azalduko du, bizipen-esperientziadun proposamenak luzatuz. Arratsaldeko 17:30etatik 19:00etara izango da tailerra Biteri Kultur Etxean, eta euskeraz izango da.
Azkenik, maiatzaren 7an Julene Armendariz Ezeiza pedagogo perinatalak eskainiko du hitzaldia. Mugak, arauak eta emozioen kudeaketa izango du hizpide, eta hausnarketarako eta egunerokotasunerako tresna praktikoak emateko tartea izango da azken saio hau. Udaletxeko areto nagusian izango da, arratsaldeko 17:00etatik 19:00etara bitarte. Euskerazko saioa izango da, aldibereko itzulpen zerbitzuarekin.
Izen-ematea apirilaren 7a bitarte
Parte hartzeko derrigorrezkoa izango da aldez aurretik izena ematea labur.eus/hazieranbidelagun webgunearen bitartez, eta apirilaren 7a izango da apuntatzeko azken eguna.
Tokiak mugatuak izango dira, eta izena emateko ordena errespetatuko da. Plaza kopurua gaindituz gero, itxaron zerrenda osatuko da. Saio batean, bitan edo hiruretan eman ahalko da izena.
Kontziliazio zerbitzua ere eskainiko du Udalak, 2 eta 6 urte arteko haurrentzat. Biteri Kultur Etxean egingo da eta izena ematean eskatu beharko da zerbitzua.