Aurreko asteburuko atsedenaldiaren ondoren, Gernikan jokatuko dute bihar trikoloreek faseko laugarren partidua

Kronika - Erredakzioa 2025ko mar. 29a, 00:00

Xabi Lukas hernaniarra Las Rozasen aurkako partiduan.

Eguerdiko 12:30etan hasiko da Gernikaren eta Hernaniren arteko partidua. Trikoloreentzat garrantzitsua da garaipena lortzea, Elite fasea lehenengo lauen artean amaitzeko. 18 urtez azpiko taldea Espainiako txapelketan arituko da. 

Pasa den asteburuko atsedenaldiaren ondoren, Gernikan jokatuko du bihar eguerdian Hernaniko Ohorezko B mailako taldeak. Elite fasea lehenengo lauen artean amaitzeko helburua du Hernanik, eta Xabi Lukas jokalariak argi dauka hori lortzeko ezinbesteko partidua dela biharkoa: «Partidua irabazita sailkapenean aurreratuko genuke Gernika eta mahai gainean kolpe haundia litzateke hori. Hala ere, badakigu han irabaztea oso oso zaila dela, azkeneko urteetan oso puntu gutxigatik galdu izan dugu».

Euskal derbia izateak ilusio berezia egiten dio Lukasi, Gernikan sortzen den giroagatik batez ere: «Niri pertsonalki asko gustatzen zait bertan jokatzea, hango zaleak asko maite ditugu eta zelai polita da. Taldea gogotsu dago, partidu guztietan bezala, baina biharkoa berezia da euskal derbia delako. Gogo asko dizkiogu Gernikako talde sendoari». 

Azken bi partiduetan garaipena lortu du Hernanik, eta bolada onak konfiantza emango dio hain une onean ez dagoen Gernikari aurre egiteko. 

 

18 urtez azpikoak Espainiako Txapelketan arituko dira

Euskal Liga lehenengo postuan bukatuta, Espainiako Txapelketa jokatzeko sailkatu da Hernaniko 18 urtez azpiko taldea. Gaur bertan jokatuko dituzte bi partidu Sevillan: lehenengoa Alcobendasen aurka (10:00) eta bigarrena Cienciasen aurka (12:00).

Klubetik taldearen lorpenaren balorazio oso positiboa egin dute.

Kronika egunero, euskaraz eta doan jasotzen segi ahal izateko, Kronikakide gehiago behar dira, eta zer esanik ez, proiektu komunikatibo sendo eta profesional bat garatu nahi badugu.
Egin zaitez KronikaKide!