Laburbirak, euskeraz sortu eta ekoitzitako film laburren zirkuituak, bere 22garren edizioa beteko du aurten eta herriz herriz dabil martxoan eta apirilean zehar.
Hernanira datorren asteazkenean, martxoaren 26an iritsiko da, 19:00etan, eta Biterin eskainiko dira film laburrak doan. Bi helburu nagusi ditu Laburbirak: euskal zinemagintza hauspotzea, zinemagileei beraien lanak erakusteko aukera emanaz; eta herritarrei euskeraz sortutako film laburrak ezagutaraztea.
Orotara, 97 minututako zortzi film-labur sorta ikusgarria osatu da, ikusleei ahalik eta emanaldi aberasgarriena eskaini asmoz. Denetariko lanak aurkitu daitezke bertan, edukiz zein estiloz; horietako asko, jada zenbait zine jaialditan saritutako lanak.
Goya sarietara izendatutako bi film labur
Hauexek dira, hurrenez hurren, aurtengo edizioan ikusgai izango diren film-laburrak: 'Prosopagnosia' (Ekain Martinez); 'Plazer bat' (Sonia Estévez); 'Betiko gaua' (Eneko Sagardoy); 'Europa' (Ekain Irigoien); 'Pentsatzen dut' (Karmele Mitxelena); 'Hor konpon' (Jone Arriola); 'Goodbay kepler' (Nerea Ayala, Patricia Fañanás, David Modroño, Iraia Yarto); eta 'Utlandsk' (Alba Lozano). Europa eta Betiko Gaua Goya sarietarako izendatuak izan ziren.
Laburbiraren aurtengo edizioak martxoaren 6an hasi zuen bere ibilbidea, Donostiako San Telmo Museoan egin zen aurre-estreinaldiarekin.
Euskerazko film laburren zirkuitu ibiltariak, Euskal Herri osoko 51 herritan ikusi ahal izango da aurtengo bilduma (22 Gipuzkoan, 19 Bizkaian, 5 Araban, 3 Iparraldean, 2 Nafarroan eta 1 Londonen).