Bueltan da, beste urte batez, Tilos 7 Pasa pala txapelketa herrikoia. Apiriletik ekainera bitarte jokatuko dute, eta pala partiduek hartuko dute Tilosetako frontoia, ia arratsaldero. Aurtengoa 14garren edizioa izango da eta hasiko da martxoko azken egunean, martxoaren 31n astelehenean.
Azkenengo urteetan bezala, lau kategoria izango dira: herrikoia, neskena, lehenengo mailakoa eta bigarren mailakoa. Eta parte hartu nahi duenak, hamabi egun ditu izena emateko, martxoaren 28ra arte baitago epea.
Horretarako, ondorengo telefono zenbakira deitu edo idatzi behar da: 615 00 44 69. Aurten, izena emateko kuota pasa den urteko berbera izango da. 40 euro ordaindu behar dira bikoteko, eta txapelketako kamixeta jasoko du opari partehartzaile bakoitzak. Dirua lehen partiduan eskura eman beharko da.
75 bikoteren langa gainditu nahi da
Pasa den urtean 75 bikotek eman zuten izena, inoiz baino gehiagok, eta aurten langa hori gainditu nahi dute antolatzaileek. 2024an lehenengo mailako garaileak Ramos eta san Miguel izan ziren; finalean, Arizmendiren eta Indaren aurka, 22-9 nagusituta. Nesken mailan, Andreak eta Ixonek 22-15 irabaztea lortu zuten, Sararen eta Haizearen aurka. Txapelketa herrikoian, Oierrek eta Arnaitzek jantzi zuten txapela, Rodriguez eta Del Rio bikotea 22-17 garaituta.
Azkenik, bigarren mailako txapelketan Aranak eta Luixak erraz menderatu zituzten Zubiria eta Mendigain, 22-5.