Kaldereroen iragarpenari erantzunez, hastear dira Hernaniko Inauteriak. Datorren ostiraletik aurrera ospatuko dituzte, otsailaren 28tik martxoaren 4ra; eta ongietorri beroena emango diete gaur eguerdian, ohiko bi hitzordu garrantzitsurekin.
Batetik, 11:45etan hasita, kalez kale ibiliko da Inude eta Artzainen konpartsa, Urumea ikastolaren eskutik. Panpinen saltoek eta makilen dantzak alaituko dituzte erdiguneko kaleak, Plazara iritsi arte. Bertan egingo dute ohiko ekitaldia, azkeneko urtean jaiotako haurrak erroldatzeko eta txertoa jartzeko. 140 kidek osatuko dute konpartsa, garai bateko pertsonaia ugarirekin: piruleteroak, globeroak, barkilleroak...
Musika Bandaren kontzertua, udaletxeko arkupeetan
Errolda eta txerto kontuak bukatuta, musikak hartuko du protagonismoa Plazan. Izan ere, bertan eskainiko du inauterien aurreko kontzertua, Hernaniko Musika Bandak. 13:30etan hasiko dute emanaldia, udaletxeko arkupeetan.
Tolosako Inauterietako piezak eskainiko dituzte kontzertuan, eta baita Donostiako Inauterietako zenbait obra ere. Azkeneko horiek, Sarriegik pianorako idatzitako lau obra dira, Joxemari Oiartzabalek orkestrarako moldatutakoak; eta Musika Bandak berak estreinatuko ditu gaurko emanaldian.
Lau pieza estreinatuko ditu Hernaniko Musika Bandak, baina denera 14 pieza dira Oiartzabalek moldatutakoak; eta aurreratu dutenez, disko formatuan grabatuko dituzte laster.
Bost eguneko kolore festa, datorren ostiraletik aurrera
Gaurkoan Inauteri giroa piztuta, datorren ostiralean murgilduko dira hernaniarrak bost eguneko kolore festan. Arratsaldeko 15:15etan egingo dute hasiera ekitaldia, ikastetxeetako haurrak Plazan elkartuta, kalejiran abiatzeko. Hortik aurrera, ez dute hutsik egingo ohiko ekintzek, aurtengo Inauterietan ere.
Horrela, hiru egunez aterako da Erraldoi eta Buruhaundien konpartsa, ostiralean bertan, larunbatean eta astelehenean. Eta Axeri Dantzak larunbatean eta astelehenean berotuko ditu herritarren bizkar eta ipurdiak. Ttarlak, berriz, igande eguerdian jantziko ditu herriko kaleak, mozorroen kalejirarekin.
Eta kolorerik faltako ez den bezala, ez da faltako musikarik ere, noski. Egunero alaituko dituzte kaleak txarangek, dultzaineroek, txistulariek edo trikitilariek; eta kontzertuak ere izango dira: Musika Bandarena ostiralean, eta Gari&Maldanbera taldearena igandean. Haurrentzako jolasak, pailazo zein magia emanaldiak, puzgarriak eta dantza saioak ere, egunero aukeran.
Kolore biziek beltzari utziko diote pasoa asteartean, azkeneko egunean. Sardina ehortziko dute, dultzaina doinu artean, Inauteriei bukaera emateko.