Euskal Herriko igeriketa txapelketa jokatuko da, asteburuan zehar Iruñean, C.D. Amaya klubeko igerilekuan. 50 metroko igerileku estalia da eta bertan parte hartzeko gutxieneko denborak egin behar dira. Txapelketa absoluto eta junior mailetakoa izango da eta maila horietan Hernani K.E.ko igerilaririk ez da sailkatu. Infantil mailan arituko dira hainbat, baina hori aurrerago izango da.
Hala ere bailarak izango du ordezkaria. Bidasoa taldeko Enaitz Goñik bi probetan eman du izena. Gaur goizean 100 metro tximeleta proban hartuko du parte eta bihar goizean, berriz, 400 metro librean. 100 tximeletakoa konpetizioaren sentsazioak hartzeko erabiliko du eta bere helburua 400 metroan urrezko domina lortzea izango da. Denborarik azkarrenarekin irtengo da, nahiz eta Errioxako Erik García aurkari gogorra izango den.
Espainiako Masters txapelketa, Oviedon
Bestetik, igerilari beteranoek Espainiako txapelketan ari dira lehiatzen ostegunetik Oviedon. Luis Goñik gaur parte hartuko du 200 metro libreetan eta domina lortzeko hautagaia da.