Sailkapeneko azkeneko postuetan egon arren, lan dezente eman zion Gallartaren Ahotsa taldeak Hernaniri, mutilen Euskal Ligako 16garren jardunaldian. Bizkaitarrek estu hartu zituzten etxekoak, baina hernaniarrak nagusitu ziren azkenean: 25-20, 24-26, 27-25 eta 25-20.
Garaipen lehiatuak lidertzara gerturatu du Hernani, gainera. Izan ere, aurreneko bi sailkatuak elkarren kontra aritu dira asteburuan, eta Navarvoley nagusitu da (3-0), Udapa Jatorkideri lidertza kenduz. Gauzak horrela, une honetan Berriozarko taldea dago lehenengo postuan, 44 punturekin; gasteiztarrak puntu bakarrera daude; eta hernaniarrak soilik bi puntura.
Liga bukatzeko sei partidu falta direnean, kontuak oso estu daude aurreneko hiruen artean, eta asko dago jokoan: aurreneko bi taldeak bakarrik sailkatuko dira Liga Nazionalera igotzeko fasera.