Zuhaitz Eguna ospatuko da larunbat honetan, hilak 25. Aurten 50. aldia izango da, baita Joxe Legarretaren omenez egingo den 36. aldia ere.
Aparrain mendiko azpialdean, Ereñotzun, haritzak eta lizarrak landatuko dira. Tartean, Hernaniko ikastetxeetako LH 3 eta LH 4 mailetako ikasleek eta haien etxekoek parte hartu ahal izango dute ospakizunean. Parte hartzaile txikienek, heldu baten laguntza ere izan beharko dute.
Larunbatean goizeko 09:00etan abiatuko da autobusa Elkano kaletik. 09:10etan Ereñotzuko parte-hartzaileak igoko dira eta Ugaldetxon bukatuko du bere bidea. Ugaldetxotik oinez abiatuko da taldea zuhaitzak landatu behar diren eremuraino. Ospakizunaren ostean, 13:00etan izango da itzulera.
Beste aukera bat, Zuhaitz Egunera oinez joatea da. Plan hori proposatzen dute Hernaniko Mendiriz Mendi taldeko kideek, eta animatzen denak aukera izango du. Hitzordua jarri dute: goizeko 07:30etan Hernaniko Udaletxeko arkupeetatik abiatuta.
Zuhaitz Egunean parte hartzeko eta izena emateko modu ezberdinak daude. Batetik autobusez joan nahi duenak 943 33 70 31 telefonora edota ingurumena@hernani.eus helbidera idatzi dezake, ostegunera arte. Oinez egitera animatzen denak 943 33 27 45 telefonora deitu dezake ostegunean bertan edota mendirizmendi@gmail.com helbidera mezu bat bidali. Gaur da mezu elektronikoa bidaltzeko azken eguna.