Aurreko urtea bukatu bezala hasi du berria Hernanik, mutilen Euskal Ligan: garaipen sendoa lortu zuen igandean, etxean, Bera Beraren kontra (3-0). Bigarren jokoan gehixeago kosta zitzaien, baina lortu zuten aurreneko hiru jokoak bere aldera bideratzea, hiru puntu eskuratzeko: 25-17, 25-22 eta 25-16.
Hori horrela, sailkapeneko bigarren postuari eutsi dio Hernanik, 33 punturekin, Navarvoley A hirugarrenarekin berdinduta. Hori bai, partidu bat jokatzeko pendiente dauka Berriozarko taldeak, Sestaoren kontra.
Hain juxtu, talde bizkaitarra da ligako laugarrena, eta gero eta urrutiago dago sailkapenean. Porrot gogorra jaso du asteburu honetan, Navarvoley B taldearen kontra (3-0), eta 24 punturekin dago, Hernani eta Navarvoley A bederatzi puntura dituela. Hortaz, badirudi bigarren posturako lehia bizi-bizia izango dutela hernaniarrek eta berriozartarrek liga bukaerara bitarte, baina lidertza ere jomugatik kendu gabe. Izan ere, 37 puntu dauzka Udapa Jatorkidek, partidu guztiak irabazita, baina Hernani zein Navarvoley A gai dira talde gasteiztarra mendean hartzeko. Aurreneko itzulian, 3-2ko emaitzarekin galdu zuten hernaniarrek haien kontra. Edozer gerta liteke, falta diren bederatzi jardunaldietan.
Porrotarekin hasi dute Gipuzkoako Txapelketa Hernaniko neskek
Hernaniko nesken talde nagusiak, berriz, porrotarekin hasi zuen Gipuzkoako Txapelketa, larunbatean: 2-3 galdu zuen etxean, Aidean taldearen kontra. Aurreko fasean azkeneko postuan bukatu ondoren, txapelketa bikain hasteko zorian izan ziren hernaniarrak, baina ihes egin zien garaipenak azkenean.