Orain arte Hernaniko Udalak etxez etxe banatu izan dituen zenbait euskarri udal eraikinetan eskuratu ahal izango dira hemendik aurrera. Paperaren gehiegizko erabilera murrizteko hartu du erabakia Udalak, eta urtarriletik ekainerako kultur programazioarekin eta Garbigune mugikorraren egutegiarekin egin du lehenengo proba.
Iaz egindako diagnostiko baten emaitza ikusita egin du aldaketa Udalak: «Bai Udal arduradun politiko, tekniko eta herritarrak, bat etorri ziren Hernaniko Udalak etxeetara paperezko euskarri asko bidaltzen duela eta kopuru hori murriztu behar zela», azaldu dute.
Hala ere, erronkaren bigarren zatia herritarren informatzeko erraztasuna mantentzea izan da: «Horregatik, euskarri horiek ez dira desagertuko, baizik eta banaketa puntu jakinetan jaso ahal izango dituzte herritarrek».
Udal eraikinetan jaso ahalko dituzte herritarrek euskarri fisiko horiek, eraikin edo zerbitzu bakoitzaren ohiko ordutegian.
NON JASO DAITEZKE?
Biteri Kultur Etxea
Euskararen Faktoria
Haur, Nerabe eta Gazteria saila
Ereñotzuko udaletxea
Hernaniko Zerbitzu Sozialak
Herritarren Harrera Zerbitzua
Kulturarteko Plaza Feminista
Plazara gunea
Sagastialdeko Libgunea
Sandiusterri eraikina
Udal euskaltegia
Udal kiroldegia
Zikuñagako Libgunea