Hernaniko Potemkin zinema taldeak 'Pazlestina' izeneko erakusketa aurkeztuko du eta bertan «errealitate gordina marrazki bidez» erakutsiko dute urtarrilean zehar. Biteri Kultur Etxean antolatuko dute erakusketa, urtarrilaren 10etik 18ra bitarte.
Erakusketaren oinarri izango dira J. Kalvellido marrazkilariaren ilustrazioak. «Hernaniko herriari 1948tik gaur egun arte Palestinako herria aurre egiten ari zaion errealitate gordina erakustea da helburua, eta gizarte gisa gure eguneroko bizitzetan genozidio hau normalizatzen saihestea», azaldu dute zinema taldeko kideek.
Potemkineko kideek azaldu dute, erakusketaren ideia 'Pazlestina' izeneko liburu baten ondorioz sortu zela. Liburua 'Viejo topo' aldizkariak argitaratu zuen 2009an, «J. Kalvellidoren marrazkiekin, eta beste zenbait idazle, intelektual, giza eskubideen aldeko aktibista eta beste zenbaiten testuekin batera», azaldu dute. Erakusketa honetara 'Pazlestina' liburuko zenbait marrazki gerturatuko dituzte, baita Kalvellidok urte hauetan zehar egindako marrazki berriak ere.
Marrazkilariaren lan artistikoaren ondoan, «zalantzarik gabe, Palestinako herriaren eskubideak defendatzeko konpromisoa» dagoela gogoratu dute antolatzaileek. «Konpromisozko eta salaketazko liburua da, haserrea, amorrua, mina baina maitasuna eta samurtasuna biltzen dituena ere. Bakea eskatzen duena, justiziarik gabe bakerik ezin dela egon adierazten duena», gaineratu dute.
Erakusketaz gain, jarduera paraleloak ere antolatu dituzte: bideo hitzaldiak, proiekzioa eta hitzaldia.
Potemkin talde autogestionatua izanik, erakusketak sortutako gastuei aurre egin ahal izateko, kotoizko poltsak jarriko dituzte salgai 10 eurotan.
|
PALESTINA ERAKUSKETA Urtarrilak 10 Erakusketaren inaugurazioa, 19:00etan Biterin. J. Kalvellido marrazkilaria bertan izango da. Urtarrilak 15 Bideo hitzaldia: Sionismoa zer da?. Arratsaldeko 19:00etan Biterin. Urtarrilak 16 Bideo hitzaldia: 1948. urteko Nakba eta Palestinako gaur egungo egoera. Urtarrilak 18 Dokumentala: 'The Gray Zone'. Dokumentala 18:00etan Biterin, ondoren, 19:00etan hitzaldia Milagrosan: Zer gertatu zen urriak 7an? hau pasa eta gero zer ari da gertatzen ekialde hurbilean?. |