Herriko guraso talde batek antolatuta, aurten ere Kalejira Herrikoia egingo dute Hernanin. Abenduaren 24an izango da, eta herriko haur eta guraso guztiek izango dute parte hartzeko aukera. Musikarien laguntzarekin egingo dute bidea, eta geldialdiak egingo dituzte gabon kantak abesteko.
Hiru abiapuntu izango dira asteartean, eta adinaren araberako taldeetan bereizi dute deialdia antolatzaileek. Hiru kasuetan 10:30etan jarri dute hitzordua.
Lehenengo ibilbidea Haur Hezkuntzako ikasleentzat prestatu dute; kasu honetan, Atsegindegitik atera, Urbieta kalea pasa eta Iturriaga kalean gora iritsiko dira Gudarien plazara. Bigarren ibilbidean Lehen Hezkuntzako ikasleak joango dira; hauek Portuko Ibarrolaburu plazan hasiko dute martxa, Oindi eta Larramendi kaleak pasako dituzte gero, eta Kaxkoan zehar borobilduko dute itzulia. Azkenik, Txantxillatik abiatuko dira Aratz Ikastolako ikasleak; Oarso, Elkano eta Txirrita kaleetan behera egin ondoren, Izpizuatik barrena iritsiko dira Gudarien plazara.
12:00etan ekitaldi nagusia egingo dute Gudarien plazan, hiru ibilbideetako ikasleak elkartuta. Euria egiten badu, Atsegindegin egingo dute ekitalditxoa.
Jasotako dirua Pausoka Elkartearentzat izango da
Herriko ikasleak izara batekin aterako dira kalera, eta bertan pilatzen duten diru guztia Pausoka Elkartearentzat izango da.
Antolatzaileek parte hartzeko deia egin diete herritar guztiei: «Aurtengoa ere ilusioz prestatutako ekimena dugu, beraz, denontzako berezia izan den egun horretan parte hartzera gonbidatzen zaituztegu. Era berean, azpimarratu nahi dugu, ekimenak arrakasta izan dezan, guztion konpromezua eta laguntza ezinbestekoa dela».