Hernaniko ostalaritza eta merkataritza establezimendu gehienetako paisaia euskaratu du Dobera Euskara Elkarteak. Hernaniko Udalarekin elkarlanean jarri zuten martxan proiektua, eta Amaiur Erkizia hernaniarra arduratu da prozesua gauzatzeaz eta jarraipena egiteaz.
2021ean jarri zuen martxan Doberak herriko paisaia linguistikoa eraldatzeko proiektua, baina orain arte ezin izan dute prozedurarekin asmatu: «2021ean sortu genuen gida, baina segituan konturatu ginen jarraipen haundia behar zuela prozesuak. Hasieran herri osoa hartu genuen, eta esperientzia horretatik konturatu ginen eraginkorragoa zela txikitik eragitea», azaldu du Xabier Ezpondak.
Erkizia Kaxkoko establezimenduetatik hasi zen lehenengo erronda egiten, eta pixkanaka zabaltzen joan da lan eremua: «Pixkanaka joan gara herriko eremu haundiagoa hartzen. Bisitak egin nizkien lehenengo, eta establezimenduetako kideak konpromezuak hartzen joan dira».
Herriko merkatariek eta ostalariek begi onez ikusi dute proposamena, baina Erkiziak nabarmendu du dexenteko jarraipena egin behar izan duela paisaia benetan aldatu arte: «Egia da bisita bat baino gehiago egin behar izan ditudala. Asko daude aldatzeko prest, baina gauzak eginda eman behar dizkiezu. Tabernetako erritmoa, adibidez, oso estua izaten da, eta askok ez dute tarterik euskeratzen hasteko. Azkenean, guk geuk bukatu dugu euren kartak euskeratzen eta diseinuak egiten».
Ostalaritzan kartak, menuak eta kartelak euskeratu dituzte gehien; merkataritzan, berriz, produktuak izendatzeko txarteltxoak. Hasiera batean 'txorakeriak' diruditen horietan ere lan haundia egin behar izan du Erkiziak: «Ez dirudi aparteko ezer, baina atean 'cerrado', 'empujar' edo 'lunes' jartzen du komertzio gehienetan, eta horrek eragin haundia du iruditerian».
Prozesuak iraun duen bitartean merkatariek eta ostalariek izandako jarrera ere goraipatu du Ezpondak: «Hain harrera ona egiten badute da kontziente direla euskerak duen garrantziaz, laguntza behar dute, eta gu emateko prest gaude, baina badakite garrantzizkoa dela».
| OSTALARITZA | MERKATARITZA |
| Akeit - Arbela eta ordutegia Aieko - Barruko arbela Antziola - Ordutegia eta oharrak Cafe con Flores - Arbelak Eusko Kebab - Karta Elkano Taberna - Karta Gunea - Arbela eta menua Harresi - Karta eta arbela Ilargi Taberna - Karta Kalamona - Ordutegia eta arbela Karibe - Kartela eta karta Kixkal - Karta Latxunbe - Menuak elebitan Tamer - Karta Zumardi - Karta |
Begira Optika - Ordutegiak Goxo Belardenda - Kartela Mariscos Hernani - Ordutegia Frutas Hernani - Fruten izenak Etxarri - Ordutegia Isu - Fruten izenak Urkia - Fruten izenak Lili bat - Loreen izenak Locutorio Vasco Latino - Kartelak Marna - Ordutegiak Nere Bio - Ordutegia Ortzimuga - Fruten izenak Xarmant - Kartela Rosa - Etiketak eta oharrak |
Paisaia euskeratzearen garrantzia nabarmendu du Doberak
Proiektu garrantzitsua izan da Doberarentzat, eta egindako lanak duen eragin positiboan jarri du azpimarra Ezpondak: «Hernanin euskeraz bizi nahi dugun asko gaude, eta eskubide bat da zerbitzu horiek euskeraz jasotzea. Horrez gain, establezimenduentzat ere onuragarria da euskerazko eskaintza izatea, gertutasuna eta prestutasuna transmititzen ditu».
Hernaniko Udalak dirulaguntzak eskaintzen ditu establezimenduetako errotulazioa euskeratzeko. Hortaz, interesa dutenek Euskara Zerbitzura idazteko aukera dute (euskara@hernani.eus eta 943 33 70 29).
Horrez gain, Doberako kideak prest agertu dira hemendik aurrera establezimenduei laguntza eskaintzeko eta edozein zalantza argitzeko.