Nere Borda parkea astelehenean inauguratu zuten eta hemendik aurrera irekita egongo da jendearentzat goizetik gauera. Guztira 5.685 metro karratu ditu eta 63 espezie desberdinetako landareak ikusi daitezke. Joxan Rekondo Alkatea eta Andoni Amonarraiz zinegotzia izan ziren inaugurazioan, Udaleko lorazaina eta inguratutako herritarrekin batean.
Parkeak bi zati
Nere Borda parkeak bi zati nagusi ditu. Bata, Latsunbeko rotonda parean dago eta erabat irekia da. Aspalditik dago bukatua eta zabalik. Zati hori ingles estiloko lorategia da eta zedro urdinak eta Himalaiakoak, palmerak, magnolioak, ezpelak eta abar ditu. Beste zatia da atzo inauguratu zutena. Sarrera du Traspakar ondotik eta goizean ireki eta gauetan itxi egingo dute.
Bigarren zati hau 3 eremutan dago banatua. Lehenengoa sarrera ondokoa da eta arbolaz dago osatua: izei gorriak, zedroak, erramuak eta abar daude eta baita intsinis pinu galanta ere. Diputazioko teknikarien arabera Gipuzkoako intsinis pinu haundiena da Nere Bordan dagoena: luzeran 25 metro ditu eta 4,1 metroko gerri buelta. Aurrerago lorategi klasikoa dago eta arbustuz egindako hesi borobilak eta palmondoak ditu. Beste partea esperimentala da eta erakusketak egiteko, ikastetxeetako haurrek loreak aldatzeko eta abar erabiliko da.
Informazio guztia sarreran dagoen informazio taula batean aurkituko du Nere Bordara inguratzen denak eta arbola eta landare bakoitzak ere bere plaka daramaki, izena eta beste zenbait daturekin.
Hiru arbola haundienak Hernanin
Nere Bordakoa da Gipuzkoako intsinis pinu haundiena, Diputazioko teknikariek aztertutakoaren arabera. Gipuzkoako haritzik eta Gingo Biloba haundiena ere Hernanin daude. Haritza Etxeberrin dago, herri lurretan, Etxeberriko etxe haundien atzekaldeko mendixkan. Gingo Biloba haundia, berriz, Goiz Eguzkiko parkean dago eta espezie horretako Gipuzkoako haundiena ezezik Euskal Herriko haundiena ere izango da seguruenera.