Elur Txori elkarteak sortu zeneko 50garren urteurrena ospatzeko ekitaldiak izan zituen atzo eta umore onean ospatu zuten goizetik iluntzera artekoa. Goizean, bi pelota partidu jokatu ziren Tilosetan, jubenil mailakoa bata eta afizionatu mailakoa bestea. Jubeniletan Arrieta-Arrietak 22- 13 irabazi zioten Bilbao-Otaegiri eta afizionatuetan, EsnalAranaldek 22-16 irabazi zieten Huizi-Gorrotxategiri.
Argazki jendetsua
Bazkal aurrean, Elur Txoriko bazkideek argazkira azaltzeko deia izan zuten eta koadrila latza elkartu ziren plazan, goiko argazkian ikusi litekeen moduan. Eliza aurreko eskaileretan argazkia atera eta bazkaltzera joan ziren guztiak. Bazkaritan, berriz, elkartea sortu zuten bazkideak omendu zituzten eta elkarteko historia biltzen duen liburuxka banatu zieten bazkaltzen izan ziren guztiei. Mende erdi honetan askotan egin izan duten moduan, beren bertsoekin girotu zuten bazkari hasiera eta bazkal ondoa Julian Ezeiza Aterpe eta Antton Garinek.
Gaur meza eta bola
Gaur ere badira urteurrenaren bueltako ekintzak. Goizeko 09:30etatik aurrera bola txapelketa izango da Goiz Eguzkin eta 12:30etan hildako bazkideen aldeko meza San Joan bataiatzailea parrokian.