Ozta-ozta libratu zuten Imanol Ansak eta Aritz Juaneneak, aurreko astean, hil ala biziko lehenengo partidua: 8-7 irabazi zieten desenpatean Urrizari eta Larrañagari. Baina egoera onean izatetik oso urrun daude urnietarra eta saldiastarra oraindik, Binakako Txapelketan; eta oso zita garrantzitsua daukate gaur: hil ala biziko bigarren partidua jokatuko dute, Josetxo Ezkurraren eta Xabier Azpirozen kontra, 16:30etan hasita Galarretan.
Une honetan bi punturekin daude Ansa eta Juanenea, ligaxkako azkeneko postuan; eta Ezkurra eta Azpiroz dira aurrekoak, zazpi punturekin, partidu bat gutxiago jokatuta. Gaur irabazita, haiengana gerturatuko lirateke Ansa eta Juanenea; baina, galduz gero, ia matematikoki geratuko dira txapelketatik kanpo. Karanbola ikaragarria beharko lukete aurrera egiteko, kasu horretan.
Gaur bertan, Aitor Aiestaran hernaniarrak ere jokatuko du, bigarren mailako txapelketan, Aldaberekin batera, Gurrutxagaren eta Martirenaren kontra.