'3,2,1... Ekin!'. Irteerako seinalea entzun orduko ziztu bizian atera ziren irteeratik Hernaniko eskoletako gaztetxoak. Ave Maria parkean prestatu zuten Eskola Kirolako krosaren ibilbidea, eta bertako belazean barrena ibili ziren korrika.
Herriko ikastetxe guztietako haurrek hartu zuten parte. Beroketa saio batekin hasi zuten goiza, oraindik erdi lo iritsi ziren horiek pixka bat aktibatzeko. Guztiek ondo berotu ondoren, benjaminen lasterketa egin zuten lehenengo, eta alebinek hartu zuten gero lekukoa.
Lasterketak lasterketa, giro ederra sortu zuten Ave Maria parkean, eta gustura ibili ziren lagunekin jolasean. Hernaniko atletismoak badu etorkizuna.
