Azaroaren 16an egingo du Euskal Herriko Bilgune Feministak, Laudioan, Topaketa Feministen X. edizioa. Dagoeneko izena eman daiteke, www.bilgunefeminista.eus webgunean edo sare sozialen bidez. Hernanitik deia luzatu dute, parte hartzeko.
Bi urtean behin antolatzen dituzte topaketa horiek, eta aurtengoan «Euskal Herri feministarantzako bidean nondik, nora eta nola transmititu» zehazten jarraitu eta trantsizio feministaren oinarrietan sakonduko dute. «Egungo testuinguru sozial, politiko eta ekonomikoa aintzat hartuta, gaur egun Euskal Herrian eta munduan dauden erronka konplexuei galderak eta erantzun posibleak bilatzeko ariketa egingo dugu Laudion», adierazi dute Bilgune Feministatik.
Leloa, 'Trantsizio feminista dimentsio guztietan'
'Trantsizio feminista dimentsio guztietan' izango da aurtengo leloa, eta nabarmendu nahi dute antolakuntza eta militantzia feminista orotariko gune eta eremuetatik artikulatzeko beharra. «Gure lanaren dimentsioa hedatu nahi dugu: auzoetan, herrietan, herrialdeka nahiz marko nazionaletan. Egunerokotasunari lotutako esparruetan eta eremuz eremu intzidentzia feminista artikulatzen jarraitu nahi dugu».
Etorkizuna izango da aurtengo ardatzetako bat, eta gaur egun gailentzen diren joerak zalantzan jarri eta «etorkizun berrietan, egingarrietan eta duinetan» pentsatzeko galdera berrien bila joan nahi dute. «Irudimena entrenatu nahi dugu, etorkizunean pentsatu, orainaldi bizigarriagoak ere sortzeko. Horretarako, utopiei begira jarriko gara arratsaldean, Etorkizun desiragarrietarako zirriborroak: Trantsizio feministarako utopiak talde-ariketa gidatuarekin».
Aurretik, Hitz egin dezagun kapitalismoaren bukaeraz solasaldia izango dute goizean, lau gonbidaturekin.