Ez dira txapelaren lehian izango Xabi Apaolaza eta Markel Lizeaga hernaniarrak, Gipuzkoako Binakako Txapelketan, ohorezko mailan. 14-22 galdu zuten semifinala atzo, Hernaniko kiroldegiko frontoian, Unai Amiano eta Unai Albeniz tolosarren kontra.
Parekatua hasi zen finala, eta halaxe izan ziren bi bikoteak 5-5eko berdinketara arte. Aginte makila hartu nahi zuten tolosarrek, baina ondo eusten zieten hernaniarrek, defentsan oso sendo. Hortik aurrera, ordea, erritmoa aldatu eta bere abilezia guztiak erakutsi zituen Amianok: oso luze egin zituen sakeak, Lizeaga estu hartuz; eta behin eta berriro asmatu zuen errematean. Horrela, bederatzi tanto lortu zituzten segidan (5-14).
Erreakzionatzen hasi ziren hernaniarrak, Apaolazaren bi gantxo ederrekin, zaleek gogoz txalotu zituztenak. 11-16 gerturatu ziren, baina erremate finak lotzen jarraitu zuen Amianok, eta ihes egin zieten berriro (12-19). Azken tantoetan, joera aldatzen saiatu zen Apaolaza, txokotik sakatuta; baina jokoan nagusitzea lortu zuten arren, beranduegi zen markagailua iraultzeko.
