Aurreneko edizioaren arrakasta ikusita, segida emango diote Osiñagako Udazkeneko Azokari, eta gaur bertan egingo dute bigarrenez. Goizeko 10:30etatik eguerdiko 13:30etara izango da, Itxas-Buru sagardotegiko aparkalekuan. Denetik topatuko dute gerturatzen direnek, festa giro polita tarteko.
Batetik, auzoko ekoizle eta sortzaile ugariren postuak izango dira bertan: Perrapa baserria, Arriatzu baserria, Zatika Diseinuak, Telleria haragiak, Txintxuenea gazta eta auzoko sagardogileak. Gainera, 'Suima' liburua aurkeztuko du Dori Correa idazleak, azokan bertan.
Horrekin batera, herri kirolak eta bertsolariak ere izango dira. Aizkoran ariko da Jokin Urretabizkaia 'Basozabal', harrijasotzen Elene Alkorta, eta bertsotan Andoni Mujika 'Anatx' eta Iker Ormazabal 'Tturko'.
Eta azkenik, nola ez, jan-edana ere izango da aukeran. Auzoko produktuekin egindako pintxoak eskainiko dituzte azokan.Plan polita, eguraldi onarekin, oinez bertaratu eta gozatzeko.