Astebete geratzen da aurtengo Mendizale Asterako. Azaroaren 4an hasi, eta azaroaren 8ra bitarte, egitaraua antolatu dute Mendiriz Mendiko kideek. Azaroaren 17an, bazkideen eguna ere ospatuko dute.
Datorren astean egunero elkartuko dira mendizaleak, eta proiekzio guztiak arratsaldeko 19:30etan hasiko dira, gaztexoena izan ezik, eta denak Biteri Kultur Etxean egingo dira. Mendiriz Mendiko kideak ez ezik, mendia gustuko duen edonor izango da gonbidatua aste honetan parte hartzera, eta kirolaz gehiago ikastera.
Egitaraua 'Resistance climbing' dokumentalaren proiekzioak irekiko du, Luzio Egigurenen eskutik. Film honekin, modu ezin hobean ikusten da zein den palestinarren bizimodua okupazio eta gerra garaian, bertako eskalatzaileen bidez ondo islatzen baita, hala diote antolatzaileek. Bestalde, dokumentala, egungo gatazkaren aurretik filmatuta dagoela nabarmendu dute.
Asteartean, 'Gure bidea' izango da ikusgai, Beñat Bereziartua, Aritz Holgado eta Eñaut Pagolarekin. Pelikula, pandemia betean hiru lagunek Pirineoak zeharkatzeko abenturan dago oinarrituta. Mendi bizikletaz, oso gutxik egiten duten bide bat egingo dute protagonistek, eta soinean behar-beharrezkoa dena soilik eramango dute.
Asteazkenean, Suam del Cerroren 'Expedición al gran cañon del colorado' proiektatuko da. Abenturak 17 egun iraun zuen, kanoa batean autonomia osoz bidaiatuz, Colorado ibai ahaltsuaren esanetara.
Ostegunean, 'Urumea zena eta dena' hitzaldi zikloa egingo da, Hernaniko Udala eta Aranzadi Zientzia Elkartearen lanari esker. Solasaldian egongo dira: Miren del Val (geografian lizentziatua eta geokronologian aditua), Iñaki Antiguedad (geologian doktorea eta hidrogeologian katedraduna), eta Arturo Elosegi (biologian doktorea eta ekologian katedraduna).
Azaroaren 8an,
gaztetxoen txanda
Gaztetxoen irteeretako argazkien bilduma berezia ikusteko aukera izango da azaroaren 8an, arratsaldeko 18:00etan. Jarraian, dominak ere banatuko dituzte. XLV. Argazki lehiaketako sari banaketa ere egingo da, eta ondoren, elkarteak urtean zehar egindako jardueren irudien proiekzioa.
Azaroaren 17an, bazkide eguna
Mendizale Asteari amaiera emateko, bazkideen eguna ospatuko dute azaroaren 17an, eta azken egun honetan, igandean, Ataun-Lizarrausti irteera egingo dute.
EGITARAUA
MENDIZALE ASTEA
Azaroak 4, astelehena: 'Resistance climbing'', Luzio Egiguren. 19:30etan Biterin.
Azaroak 5, asteartea: 'Gure bidea', Beñat Bereziartua, Aritz Holgado eta Eñaut Pagola. 19:30etan Biterin.
Azaroak 6, asteazkena: 'Expedición al gran cañon del colorado', Suam del Cerro. 19:30etan Biterin.
Azaroak 7, osteguna: 'Urumea zena eta dena', hitzaldi zikloa. 19:00etan Biterin.
Azaroak 8, ostirala: gaztetxoen irteeretako argazkien proiekzioa eta XLV. argazki lehiaketako sari banaketa. 18:00etan, Biterin.
Azaroak 17, igandea: Bazkide eguna.