Bakailao pintxoak izan dira eguraldi txarrari aurre egiteko erremedioa

Sari Herrikoian hirugarren postua lortu zutenean harrituta geratu ziren Apeadero tabernan, eta harridura are gehiago haunditu zen Epaimahai Profesionalaren Saria jasotzerakoan. Bistan denez, emaitza ezinhobea eman die Itsasarte pintxoak, eta «oso pozik» daude lortutakoarekin.

Herriko jendearengandik iritzi oso onak jaso zituzten lehenengo astean, eta bigarren astetik aurrera asko areagotu zen bisitari kopurua: «Jendea errepikatzera etorri zen eta bezero berri asko pasa dira tabernatik pintxoa probatzera. Herrian gure pintxoa goxoa zegoela zabaltzeak eragin haundia izan zuen».

Aurten seigarren aldiz parte hartu du Apeaderok Bakailao Astean, eta urtetik urtera gorakada nabarmena sumatu dute bertaratzen diren herritarren kopuruan. Tabernan bertan sukalderik ez izateak baldintzatu du lana, baina moldatu dira egunero 200 pintxo baino gehiago zerbitzatzeko. «Sukalderik ez daukagunez bakailao ketua erabiltzen dugu beti, lagun batek hala gomendatuta. Urtetik urtera oinarri hori moldatzen eta hobetzen joan gara, eta aurtengoan asmatu dugu. Pozik gaude emaitzarekin». 

Bakailao Astean izandako mugimenduarekin ere gustura geratu dira Apeaderon: «Guretzat suposatzen du mugimendu gutxi izan ohi den garaian bi astez oso ondo lan egitea». 

Epaimahaiarentzat onena izan den pintxoa ostegunetan jarriko dute Apeaderon, 19:00etatik 21:00etara.

Txilin Txin Txi pintxoarekin lortu du Txili tabernak 12. Bakailao Asteko Herritarren Lehenengo Saria. Egindako lanaren ondoren, «poz haundiz» jaso zuten albistea. «Bi aste horietan ez gara 200 pintxotik behera ibili, lan gogorra izan da, baina emaitzak asko poztu gaitu». 

Txili tabernakoek ondo dakite zer den Bakailao Asteko sariak jasotzea, baina aurtengoan zalantza puntu batekin ekin zioten lehiaketari: «Txitxirioak sartzen arriskatu egin genuen. Bi aukera bakarrik geneuzkan buruan; jendeari asko gustatzea ala batere ez gustatzea».

Pintxoa sortzeko ideia garai bateko plateren osagaietatik etorri zitzaien: «Lehen txitxirioekin jaten zen bakailaoa, eta bagenekien lehen hala egiten bazen ezin zela nahasketa txarra izan. Gero saltsa batzuekin eta onddo zati batekin osatu genuen, baina oinarria lehengo errezeta hura izan da».

Emaitza horretara iristeko, ordea, lan asko egin behar da aurretik. Txilin ere proba asko egin dituzte pintxoarekin gustura geratu arte: «Pentsatzen duzu osagai batek funtzionatu dezakeela, eta probatzean konturatzen zara ez dela ondo geratzen».

Bakailao Asteak iraun duen bitartean pintxoa dastatzeko tartea izan ez dutenek aukera izango dute hemendik aurrera Txilin bertan probatzeko: «Gustatzen den hori zergatik kenduko dugu? 2014an atera genuen pintxoa oraindik mantentzen dugu, eta hau ere ematen jarraituko dugu. Jendea tarteka etortzen da propio pintxo hauek probatzera, eta bertan izango ditu zain».