Chillida Leku Distirabirak argi arteen jaialdia Chillida Lekura iritsiko da gaur eta bihar. Bi gauez, 19:00etatik 00:00etara, Chillida Lekuren lorategiak eta Zabalaga baserria izango dira hitzorduaren epizentroa, eta argia, ikus-entzunezko teknikak, arkitektura eta paisaia protagonista izango diren instalazioak eta emanaldiak erakusteko espazio bizigarria eskainiko du.
Distirabiraken parte hartzen duten artista asko museorako propio sortzen ari dira beren piezak. Jaialdi hau aukera paregabea izango da museoa ikuspegi ezberdinetatik bisitatzeko, ikuslea Chillida Lekuren beste espazio eta txoko batzuetan fokua jartzera eramango duten sentsazio berriak eskainiko baitituzte.
Musika, artea eta argi-proiekzioak
Distirabirak iluntzean izango da eta Gau Garbi Ilunarekin hasiko da, Chillida Lekuren sarreratik baserriraino Easo Sinfoniettaren eskutik, Lucia Arzallusen zuzendaritzapean. Iñaki Carcavillak horretarako konposatutako obra Eduardo Chillidaren eskulturan oinarritzen da, jolas espazial eta musikal bat eraikitzeko.
Jaialdiaren programa bi zatitan banatzen da: alde batetik, museoko hainbat espaziotan elkartuz joango diren zuzeneko emanaldien programazioa izango du, eta, bestetik, etengabe bisitatu ahal izango diren erakusketa, instalazio eta muntaiak izango dira. Zuzeneko emanaldiak, Easo Sinfoniettaren ibilaldi musikala izan ezik, desberdinak izango dira gauero.
Aire zabaleko jardueretan Nagore Legarretaren Suzko Irudiak proiektatuko dira
Baserriaren harrizko fatxada aire zabaleko pantaila bihurtuko da, eta bertan, gaur, Nagore Legarreta argazkilari hernaniarraren Suzko Irudiak argazki proiektua proiektatuko da, raga indiar gisa. Gau bertan, Amaia Mirandak Mientras vivas brilla lana aurkeztuko du, Maca Parada artistaren zuzeneko lan bisualarekin. Giro intimista eta lasai horretatik soinu leherketa batera igaroko da Yonkis Zaldiak Proiektuaren estreinaldiarekin.
Bihar berriz, agertoki nagusia sokekin, txalapartarekin eta Basabiren elektronikarekin beteko da OMA bere azken lanaren aurkezpenean. Ondoren, C.OU. taldearen txanda izango da eta Iñaki Lopezek itxiko du jaialdia.