Hernaniko Ohorezko B mailako taldeak ez zuen hutsik egin denboraldiko lehenengo partiduan. Oviedoren bisita jaso zuen Landaren, eta zaleen aurrean 41-3 irabaztea lortu zuten trikoloreek.
Defentsan sendo eta erasoan fin ibili ziren hernaniarrak. Atsedenaldira iristerako ondo bideratuta zeukaten partidua; 27-0 aurretik amaitu zuten lehenengo zatia, eta dinamika berari eutsi zioten bigarrenean.
Herritar ugarik egin zuten bat taldearekin, eta giro onean gozatu zuten denboraldiko lehenengo partiduaz, eguerdiko eguzkipean.
Asteburu honetan Getxoren zelaian jokatzea egokitzen zaio Hernaniri. Taldearen asmoa garaipenak pilatzen jarraitzea da, partidu erabakigarrietara igoera fasean sartzeko aukerekin iristeko.