Hernaniko sortzaileek garrantzi berezia, udazkeneko kultur agendan

Protagonismo berezia izango du­te Hernaniko sortzaileek udazken honetan, herriko kultur agen­­dan, musikan, arte plastikoetan eta antzerkian egin diren lanez gozatzeko aukera izango baita. Urritik abendura bitarteko programa osatu du Hernaniko Kultura sailak, eta tartean izango dira musika, dantza eta literatura emanaldiak. Bihar jarriko dira emanaldietako sarrerak salgai, Biteri kultur etxean eta online, kultura.hernani.eus webgunean.

Musika, gaurtik hasita

Gaur hasiko da udazkeneko musika eskaintza, bailarako musikariekin: Xabi Elizegi eta Irati Jauregi hernaniarren eta Beñat Kamio ereñotzuarraren Karena taldeak kontzertua eskainiko du. 

Bestalde, dantza emanaldi bat ere izango da urriaren 24an, Aukeran konpainiaren eskutik: 'Migratzaileak'. Satxa Soriazu musikariak 'The megadeth project' aurkeztuko du azaroaren 14an, eta Iñigo Montero saxofonistak gradu amaierako kontzertua emango du abenduaren 5ean.

Urte bukaeran, berriz, zutika­ko kon­tzertua izango da, eta Idoia Asurmendi aramaioarra zuzene­an ikusi ahal izango da.

Antzerki zikloa, azaroan

Azaroaren 26tik 28ra egingo da udazkeneko antzerki zikloa, eta hiru emanaldi barnebilduko ditu, bi euskaraz eta bat gazteleraz. Hirurak Euskal Herriko konpainiek sortutakoak dira: 'Miñan' (Artedrama), 'El patio de las moreras' (Vaiven teatro) eta 'Futbolistoc' (Zuhaitz Gurrutxaga). Antzerki zikloko bonoa ere jarriko da salgai bihar, 20 euroren truke hiru emanaldietara sartzeko aukera eskainiko duena. Bonoak Biterin soilik eskuratu daitezke.

Haurrentzako lau antzerki saio ere izango dira, tartean Eus­kalbarook Ensembleren 'Euskelele' lana, abenduaren 12an, Musika Eskolako haurren abesbatzak lagunduta. Abenduaren 19an, An­­doni Mutiloa hernaniarraren 'Nire fantasia' kabareta ikusteko aukera ere izango da.
 

Euskerazko komiki azoka

Hernani euskerazko komikigin­tzaren epizentro bilakatzeko sa­ia­keran, Hernaniko Udal Liburu­tegiak HernaniKomik an­tolatu du, azaroaren 15 eta 16rako. Liburutegiko hiru irakurle taldeak ere abian dira hileroko saioekin: euskerazkoa, gaztelerazkoa eta feminista. Horrez gain, ipuin kontaketa saio berezia izango da urriaren 23an, 8-10 urteko haurrentzat: Edurne Mitxeok 'Gau Beltza' kontaketa antzeztua eskainiko du. 
 

Erakusketa sorta

Lau erakusketa izango dira dato­zen hilabeteetan, Biterin. Udal­biltzaren 'Geuretik Sortuak' programarekin sortutako komikien era­­­kusketa bihar arte dago ikusgai. Aurrerantzean, beste hiru; tar­tean, Hernaniko Uxue eta Mi­ren Bereziartua ahizpek sortu du­ten 'Gure herriko señorak'.