Hitz Andanaren zazpigarren edizioa ospatuko da gaur, Hernaniko Udal Liburutegiak eta Dobera Euskara Elkarteak elkarlanean. Hitzaren inguruan osatutako egitaraua antolatu dute, hitzak begietatik baino, beste modu batzuetara herritarrengana helarazteko helburuarekin.
Jaialdia gaur arratsaldeko 19:00etan hasiko da, 'Hiru podcast' proiektuaren aurkezpenarekin, Biterin. Miren Gojenolak zuzendu duen proiektua izan da, eta Uxue Apaolaza, Iñigo Legorburu eta Ainara Ortega idazleek Hernaniko kale bat abiapuntu hartuta, istorio bana idatzi dute, eta baita grabatu ere. Gaur, hiru idazleak izango dira euren ipuinak kontatzen, herriko bi musikarik lagunduta.
Dantza eta musika emanaldia ere eskainiko du Hitz Anadanak, bihar, 19:00etan 'Arineketan: zaharrak berri' emanaldia izango da, Biterin. Emanaldian parte hartuko dute Iñar Sastre, Jagoba Astiazan eta Haatik dantza konpainiak, Aiert Beobidek zuzenduta. Ostiralean, Maite Larburu hernaniarra igoko da oholtzara, Harkaitz Cano eta Beñat Barandiaranekin batera, eta larunbatean Doberaren liburu eta disko azoka egingo da, Atsegindegin.