Landareko errugbi zelaira ere iritsiko Donostiako Zinemaldia, oso modu berezian. Izan ere, lagunarteko partidua jokatuko dute Azeri Zaharrak eta Le Quinze de La Pelloche taldeek, gaur arratsaldeko 18:00etan hasita.
Talde frantziarra da La Pelloche, zinemaren munduko profesionalek osatzen dutena. Nabarmendu dutenez, Frantziako zinemagintzaren aurreneko errugbi taldea da, eta haien bisita jasoko dute Hernaniko beteranoek gaurkoan.
Irabazi asmorik gabeko elkartea da Le Quinze de La Pelloche, 2019an sortu zutena; eta 160 kide dauzka gaur egun. Horietatik 50 bat etorriko dira Hernanira, aurreratu dutenez. Kideen artean daude zinema zuzendariak, produktoreak, saltzaileak, banatzaileak, aktoreak, zinema ikasleak... Errugbian aritutako jokalari beteranoak ere badaude tartean. Astero elkartu ohi dira, entrenatzeko eta errugbiaz gozatzeko.
«Zinemaren beste ikuspegi bat ematen saiatzen gara, errugbiaren baloreetan oinarritutakoa. Solidaritatea, joko garbia, determinazioa... Eta hirugarren denbora, kontrarioekin batera jan, edan eta kantatzeko baliatzen duguna», azaldu du Pierre Mazars taldeko presidenteak.
Lagunarteko beste bi partidu gaur, Landaren
Zinemaldiarekin lotutako partidu bereziaz gainera, beste bi lagunarteko ere jokatuko dira gaur Landaren, goizean zehar. Zehazki, Hernaniren eta Bera Beraren arteko bi partidu izango dira, bi kategoria desberdinetan: 18 urtez azpikoena aurrena, 10:30etan hasita; eta 16 urtez azpikoena ondoren, 11:45etan.
Bien bitartean, prestaketa lanekin jarraitzen dute Ohorezko B Mailako mutilek, liga hasierari begira. Urriko bigarren asteburuan egingo dute debuta trikoloreek, Landaren bertan, Real Oviedoren kontra.