Denboraldiari ondo ekitea beti da garrantzitsua, baina koxka bat gorago dago Hernanik larunbatean egin zuena, Euskal Ligako estreinako partiduan: 11-0 menderatu zuen Altzarrate, Zubipen. Hori horrela, talde berdea da Euskal Ligako aurreneko liderra, beste inork ez baitu halako alderik lortu, ezta antzekorik ere.
Euskal Ligan talde berria da laudiotarra, baina ez zuten ezustekorik nahi hernaniarrek, eta hasieratik nagusitu ziren jokoan. Baita markagailuan aurrea hartu ere, hasi eta gutxira: Garazi Lizarragak sartu zuen estreinako gola, 8garren minutuan. Berdeen baloi jabetza erabatekoa izan zen, baina arabarren atezainaren akats bat baliatuta lortu zuen bigarren gola Paula Soroetak, presio bikaina eginez. Hortik aurrera, gol festa etengabea izan zen berdeentzat. Atsedenaldira iristerako, hat-tricka lortua zuen Lizarragak, hiru golekin. Eta atsedenetik bueltan, beste zazpi sartu zituzten hernaniarrek: Elene Lujambiok aurrena, Soroetak bere bigarrena gero, Enire Beainek bi gol segidan hiru minutuko tartean, Maria Gallegok beste bat 87an, eta Cesia Sotok bi gol sartu zituen azkeneko minutuetan, soilik 20 minutu jokatu zituen arren.