Giro ederra eta emozioa, biak izan zituen presoen aldeko lagunarteko Futbol 7 Txapelketak, atzokoan. Deabru Gorriyak taldea izan zen txapeldun azkenean, finalean Valles taldeari irabazita. Biek ala biek gol aukera politak izan arren, hutsean bukatu zuten partidua, eta penaltietan jokatu zuten: 2-1 nagusitu zen talde gorria, atezainak bi penalti gelditu ondoren.
Denera, 13 talde aritu ziren jokoan, goiz osoan zehar. Hiruna partidu jokatu zituzten ligaxkan, eta final zortzirenetan ekin zieten kanporaketei. Eguerdiko ordu beroenetan, lau talde geratzen ziren lehian: Deabru Gorriyak eta Suge Gorriak semifinal batean, eta Valles eta Desportibo bestean. Kanporaketa gainditu, eta beraien artean jokatu zuten sari nagusia bi finalistek, penaltietan.
Txapelketa bukatuta, azkar dutxatu eta Atsegindegin elkartu ziren denak. 180 lagunek hartu zuten parte bazkari jendetsuan, eta Andoni Ollokiegi musikari eta abeslariak girotu zuen bazkalostea, arazo teknikoek emanaldia dezente atzeratu zuten arren...
