Aste honetan hasiko dira Urumea ikastolako jolastokia eraldatzeko lanak. Bi hilabetetan jolastokia eremu naturalagoa bilakatu eta jolas librea bultzatuko duen eremu bat sortzea da asmoa.
Zementuzko patio nagusiaren diseinua eta espazioen erabilera eraberrituko dira. Proiektu berria idazteko orduan, kontuan eduki dituzte, aurreko ikasturtean egindako prozesu parte-hartzailean ateratako zenbait ondorio. Prozesu horretan, Urumea ikastolaren beharrak, nahiak eta erronkak zeintzun ziren aztertu eta zehaztu ziren. Bide honi jarraiki hasiko dituzte aste honetan obrak.
Hernaniko Udalak adierazi du, bi izango direla aldaketa nagusiak: batetik, patioan naturaren presentzia gehitzea, eta bestetik, kalitatezko harremanak eraikitzeko eta jolas librearekin sormena sustatzeko jolastokia sortzea. «Aterpean zein aterpetik kanpo egoteko eremuak sortuko dira, eta mugimendurako jolastoki berri bat», azaldu du Udalak. Bestalde, Lizeaga auzoan dauden beharrak ere kontuan hartuko direla adierazi du.