Gaur arratsaldean jokatuko du ETE Ligako zazpigarren estropada, Hernaniko Maialen traineruak. Bizkaian ariko da, 17:00etan hasita Sestaon, Ibaizabal ibaian.
Erlojupeko proba izango da gaurkoa, eta beraz, banaka abiatuko dira traineruak, joan-etorriko lana osatzeko: 2,78 kilometroko bi luze, ziaboga batekin.
Ligako sailkapeneko ordenean hasiko dute estropada, atzekoz aurrera. Hori horrela, azkeneko sailkatua izanik, abiatzen aurrenekoa izango da Maialen, erreferentziarik gabe. Denboraldi hasiera zaila izan ondoren, bere mailan koxka bat gora egin nahi dute hernaniarrek. Zenbait estropadatan, bigarren luzean aritu dira bikain, bereziki aurreko larunbatean, Camargon seigarren sailkatu zirenean. Estropada hasieratik maila horretan aritzea izango du erronka, Hernaniko talde gazteak.