Portugalen izan zen Hernaniko Eskubaloi Taldea, beste behin, joan den astean. Estarrejako Nazioarteko Eskubaloi Txapelketa jokatu zuten bertan, eta sei talderekin aritu ziren, maila ezberdinetan: infantil, kadete eta jubeniletan, bakoitzean nesken eta mutilen talde banarekin.
Guztira, taldeko 70 jokalarik hartu zuten parte txapelketan, eta beste 11 herritarren laguntza izan zuten, entrenatzaileak eta gurasoak tarteko. Horrela, 81 laguneko espedizioa joan zen Hernanitik Estarrejara.
Torneo polita jokatu zuten Hernaniko sei taldeek, eta oso lehiakor aritu ziren, maila eta izen haundiko taldeen aurrean: Benfica, Oporto eta Avanca, besteak beste. Denetan nabarmenena, mutil infantilek osatutako txapelketa izan zen: txapeldunorde izan ziren. Hernaniko Eskubaloi Taldea «oso pozik» agertu da, aste berezi horretan zehar bizitakoarekin, talde guztiek egindako txapelketarekin eta lortutako emaitzekin.