Martxan da Zikuñaga Papelera Txapelketaren bigarren astea, eta segida emango dio torneoak aurrenekoan hartutako martxa biziari. Atzo hiru partidu jokatu ondoren, jaialdi bana izango da gaurtik ostiralera ere, arratsaldeko 16:30etan hasita, Hernaniko kiroldegiko frontoian. Guztira, 19 partidu jokatuko dituzte lau eguneko epean.
Adin guztietako esku pelotariak ariko dira bertan, eta puntako partiduak izango dira ikusgai. Gaurkoan, zortzi bikote ariko dira lehian, honako ordenean: E.Bidezabal-O.Arsuaga eta U.Cuesta-A.Huarte, zilarrezko kadeteetan; J.Bidezabal-M.Alberdi eta A.Zabala-B.Salbador zilarrezko jubeniletan; M.Salaberria-J.Salaberria eta A.Etxabe-A.Beroz, urrezko kadeteetan; eta J.Deskarga-J.Aranburu eta E.Gorostidi- A.Aranburu, zilarrezko nagusien kategorian.
Kategoriari erreparatuta, bereziki nabarmena izango da biharko jaialdia, nagusien urrezko mailako bi partidu izango baitira jokoan. 16:30etan hasiko den jaialdiko hirugarren partiduan, X.Salaberria-I.Erle eta A.Altuna- I.Aranalde bikoteak ariko dira aurrez aurre; eta segidan, elkarren kontra jokatuko dute E.Lizeaga-J.Altuna eta A.Etxezarreta-J.Peñalber bikoteek.